آذربايجانين ايستعدادلي غزل شاعيري عليرضا تياني خياباني 1337- جي ايلده تبريزين قاراباغليلار محله سينده دؤنيايا گلير. ايكي ايل سؤنرا تبريزين مشهور دميرتؤكومچولريندن اؤلان آتاسي اكبر بيگ عاييله سيله بيرليكده تهرانا كؤچور. عليرضا خياباني مادي سيخينتيلاردان دؤلايي ايلك مكتب، اؤرتا مكتب و ليسه ني تهرانين گؤمئيينده كي مؤختليف مكتبلرده اؤخور، آنجاق اؤنيورسيته يه گيريش ايمتيحانيني قازانا بيلمه يينجه عسكرليگه گئديب، 18 آيدان سؤنرا ايران ايسلام اينقيلابي نين غلبه سي نين آريندان اؤرادان ترخيص اؤلور. اؤشاقليق ياشلاريندان اعتيباراً آنا يؤردو و آنا ديلينه اؤلان سئوگيسيني حيس ائدن عليرضا خياباني هر ايلين ياي آيلاريني تبريزه بويوك آتاسي حاج نورمحمدي شربياني نين ائوينه گؤندرمه سي اؤچون آتاسينا ايصرار ائدردي. اؤنيورسيته ايمتيحانيني قازانماماق گنج عليرضانين علمه و علم اؤيرنمگه اؤلان سئوگيسيني آزالدا بيلمه ميشدي. اؤ 1359 ايلينده تحصيليني داوام ائتديرمك مقصديله تؤركيه يه گئديب، اؤ زامان مادي دؤرومو داها ياخشي اؤلان آتاسي نين يارديمي ايله ايستانبول اؤنيورسيته سي ژئوفيزيك مؤهنديسليگي بؤلومونده تحصيل آلماغا باشلار و 1364- ده اؤنيورسيته دن مأذون اؤلور- اولماز ايرانا قاييدار. عليرضا خياباني داها اؤيرنجي ايكن تبريزين اصيل عاييله لريندن بيري نين قيزي اؤلان مهري خانيملا اؤلنير و راد و سئويل آدلي ايكي ائولاد صاحيبي اؤلور. آتاسي نين واختسيز وفاتي، ايران- عراق ساواشي و ايشسيزليك عليرضا خياباني ني سربست ايشده چاليشماغا بؤنلندير.
عليرضا خياباني سؤن درجه خئييرسئور و يارديم سئور بير انساندير. احتياجي اؤلان اينسانلارين اليندن تؤتماغي حياتي نين ان اؤنملي و معنالي ايشي اؤلاراق منيمسه مكله بيرليكده، آذربايجان كؤلتورونون گليشمه سي، تاريخي اثرلر و آبيده لرين قؤرونوب ساخلانماسي و بؤيوك ادبي شخصيتلريميزين ديرلنديريلمه سي اؤچون ده اليندن گلني اسيرگه مه ميشدير.
عليرضا خياباني نين "يار ايله صؤحبت" آدلي ايلك شعر كيتابي اؤستاد يحيي شيدانين اؤن سؤزويله يايينلانميش، "يار ايله صحبت 2" آدلي ايكينجي شعر كيتابي ايسه پروفسور دؤكتور جواد هيئت ين اؤن سؤزيله بؤ ياخينلاردا يايينلاناجاقدير.
عزيز اؤخوجولاريميزين داها ياخشي تانيماسي اؤچون حؤرمتلي عليرضا خياباني ايله آپارديغيميز موصاحيبه ني تقديم ائديريك.
- محمدرضا هيئت